“Реал” Мбаппени эмас, ундан зўрини оладиган бўлди

“Реал” клуби ПСЖ ҳужумчиси Килиан Мбаппега даъвогар бўлган жамоалар орасидан чиқишга қарор қилди. Бу ҳақда Diario AS хабар берди.

Манбанинг таъкидлашича, франциялик ўйинчига бир неча мавсум давомида “Сантьяго Бернабеу” эшиклари умуман очилмайди.

Айни пайтда мадридликларнинг асосий эътибори “Боруссия” ярим ҳимоячиси Жуд Беллингемга қаратилган. Англиялик футболчини олиш учун “Қироллик клуби” премьер-лиганинг қудратли жамоалари билан рақобатлашишига тўғри келади.

Мутахассисларнинг таъкидлашича, бу масалада мадридликларда катта устунлик бор. 19 ёшли ярим ҳимоячининг ўзи “Реал”да тўп тепишга мойиллик билдирган.

Килиан Мбаппе эса, Мадрид клубини узоқ куттириб, ёзда катта пул илинжида ПСЖни танлади. Унинг бу иши “Реал” президенти Флорентино Перес ва мухлисларга жуда оғир ботди.