“Реал” ўз ўйинчисини сотиб юборадиган бўлди

“Реал” клуби раҳбарияти ёш иқтидорлардан бири Тьяго Питарчни сотиш имкониятини кўриб чиқмоқда. Бу ҳақда испан матбуотидаги нуфузли манбалардан ҳисобланган Fichajes нашри хабар чиқарди.

Манба маълумотига кўра, мадридликлар 18 ёшли футболчи учун 25 миллион евро миқдорида таклиф олган ва уни кўриб чиқишга тайёр. Асосий даъвогар сифатида “Астон Вилла” тилга олинмоқда.

“Реал” Питарчни қўшимча шартларсиз қўйиб юбормоқчи эмас. Клуб келажакдаги қайта сотувдан фоиз олиш ва тахминан 32 миллион евро миқдорида қайта сотиб олиш опциясини шартномага киритишни истамоқда.

Мадрид клубида Питарч юқори салоҳиятга эга эканига ишонишади, аммо ҳозирги шароитда у биринчи жамоада барқарор ўйин амалиётига эга бўлиши қийин. Шунинг учун трансфер варианти футболчининг ривожланиши учун имконият сифатида кўрилмоқда.

“Астон Вилла”нинг қизиқиши эса жамоани истиқболли ўйинчи билан кучайтириш истаги билан боғлиқ. Бироқ “Реал”нинг шартлари музокараларни мураккаблаштириши мумкин.

Питарчнинг келажаги бўйича якуний қарор яқин вақт ичида қабул қилинади. Клуб молиявий фойдани ва футболчи устидан назоратни сақлаб қолишни бир вақтнинг ўзида таъминлашга интилмоқда.