“Реал” ўзи тарбиялаган юлдузни ортга қайтара олмаяпти

Мадриднинг «Реал» клуби ва Италиянинг «Комо» жамоаси ярим ҳимоячи Нико Паснинг трансфери бўйича ҳалигача келишувга эриша олмаяпти. Бу ҳақда Sky Sport Italia хабар тарқатди.

Манбанинг маълум қилишича, Италия клуби 2024 йил ёзида Испания грандидан келиб қўшилган ярим ҳимоячини ўз сафида сақлаб қолишни истамоқда.

Шу сабабли «Комо» мадридликлар футболчини 10 миллион евро эвазига қайта сотиб олиш ҳуқуқини ишга туширишини хоҳламайди.

Ўз навбатида, «Реал» агар Италия клуби Нико Пасни сақлаб қолишни истаса, у ҳолда унинг тўлиқ трансферини амалга ошириши кераклигини талаб қилмоқда.

Аввалроқ оммавий ахборот воситалари мадридликлар 21 ёшли ярим ҳимоячини 60 миллион еврога баҳолаётгани ҳақида хабар берган эди.

Ўтган мавсумда Пас барча мусобақаларда 40 та учрашувда иштирок этиб, 13 та гол урди ва 8 та голли узатма амалга оширди. Унинг «Реал» билан амалдаги меҳнат шартномаси 2028 йил ёзигача мўлжалланган.

Transfermarkt маълумотига кўра, футболчининг бозор қиймати 80 миллион еврони ташкил этади.