"Реал" президентлиги учун Пересга жиддий рақобатчи пайдо бўлди

Мадриднинг "Реал" клуби президенти Флорентино Перес 2021 йил бўлиб ўтадиган президентлик сайловидан сўнг ишсиз қолиши мумкин.

Гап шундаки, “қироллик клуби” президентлиги учун яна бир жиддий номзод - бизнесмен Висенте Болуда ҳам пайдо бўлди.

Эслатиб ўтиш лозимки, 64 ёшли Болуда “Реал”ни аввал ҳам бошқарган. Аниқроғи, 2009 йил Рамон Кальдерон президентлик лавозимини тарк этгач, маълум муддат мадридликларга раҳбарлик қилган.

Маълумот учун, Перес “Реал”ни 10 йилдан буён тинимсиз бошқариб келмоқда. Айтиш керакки, 2013 ва 2017 йилги сайловларда Пересга ҳеч қандай рақобатчи бўлмагани боис у ягона номзод сифатида унинг президентлик муддати автоматик тарзда 4 йилга узайтирилган эди.