“Реал” пулни йиғавер! Мбаппе билан келишиб олган ПСЖ унга дарров нарх белгилади

ПСЖ раҳбарияти ва ҳужумчи Килиан Мбаппе ўртасидаги зиддият барҳам топди. 24 ёшли форвард ўз принципларидан воз кечди.

Маълумки, Мбаппе клуб билан келаси ёзда хайрлашмоқчи эди. Шу боис, аввал келишилгани янги  шартномани имзолашни истамади.

ПСЖ анча вақт ҳужумчини фикридан қайтаришга уринди. Охирида раҳбарият агар Мбаппе кейинги ёзда эркин агент сифатида кетадиган бўлса, клуб барбод бўлишини ҳужумчига тушунтиришга мажбур бўлди.

Янги келишувга биноан, Мбаппе 2025 йилгача шартнома тузадиган бўлди. Унда келаси ёз уни “Реал”га трансфер қилиш ҳақида банд киритилади.

ПСЖ бу шартни қабул қилди. Энди Париж клуби раҳбарияти келаси ёз Мбаппени трансфер қиладиган клуб 200 миллион евро тўлаши кераклигини таъкидламоқда. Демак, “Реал” жорий мавсум тугаганидан кейин Мбаппени эркин агент сифатида қўлга кирита олмайди. Аксинча, белгиланган бадал пули тўлаши керак бўлади.