“Real” sig‘dirmagan futbolchiga “Barsa” boshpana bermoqchi

Ayni paytda “Tottenxem” sharafini himoya qilayotgan ispaniyalik himoyachi Serxio Regilon faoliyatini “Barselona”da davom ettirish imkoniga ega.

Ma’lumki, Regilon “Real” klubi tarbiyalanuvchisi hisoblanadi. Iste’dodli futbolchi “Qirollik klubi”da etarli o‘yin amaliyoti berilmagani bois, Angliyaga transfer qilingan.

Ayni paytda “Barselona”da chap qanot himoyasida 33 yoshli Jordi Alba o‘ynayapti. Xavi unga yosh raqobatchi va o‘rinbosar sifatida Regilonni ko‘rmoqda. Qolaversa, “Tottenxem” Xavi rejalariga kirmay qolayotgan Memfis Depay va Kleman Langlega qiziqayotgani bu transferni tezlashtirishi mumkin.

Shu o‘rinda, “Real” Regilonni birinchi bo‘lib transfer qilish huquqini saqlab qolgan. Buning uchun madridliklar londonliklarga 40 million evro to‘lashi kerak bo‘ladi. Regilon joriy mavsumda Angliya premer-ligasida 22 ta uchrashuvda maydonga tushib, ikkita gol va uchta assist muallifi bo‘ldi.