"Реал" собиқ юлдузи Европага қайтиши мумкин

Колумбиялик ярим ҳимоячи Хамес Родригес 2026 йилда Ла Лигада ўйнашни мақсад қилмоқда.

"Fichajes" нашрининг берган маълумотларига кўра,Родригес мундиалгача Европага қайтиб, ўзининг спорт формасини тиклаб олишни мақсад қилган. 34 ёшли футболчи ҳозирда Мексиканинг "Леон" жамоаси сафида ҳаракат қилмоқда. Хамеснинг амалдаги шартномаси декабрь ойида тугайди, бироқ футболчи уни узайтириш ниятида эмас. Айни вақтда Родригесга Испаниянинг "Валенсия" клуби қизиқиш билдирмоқда.

Эслатиб ўтамиз, колумбиялик футболчи 2014 йилдан 2020 йилгача "Реал Мадрид" сафида ҳаракат қилган. Шунингдек, Англиянинг "Эвертон", Грециянинг "Олимпиакос", Бразилиянинг "Сан-Паулу" ва Испаниянинг "Райо Вальекано" клубларида ҳам тўп тепган.