"Реал" суперўйинчи бўйича музокара бошлайди

Мадриднинг «Реал» жамоаси Лондоннинг «Челси» клуби ярим ҳимоячиси Энцо Фернандес трансфери бўйича музокараларни бошлашга тайёрланмоқда, деб хабар бермоқда AS манбаси. 

Испания нашри маълумотига кўра, «Қироллик клуби» раҳбарияти сўнгги соатларда 25 ёшли аргентиналик футболчини олишга алоҳида эътибор қаратиш ҳақида қарор қабул қилган. Бу қарор «Бавария» ярим ҳимоячиси Майкл Олисе трансфери деярли амалга ошмайди, «Вест Хэм» футболчиси Матеуш Фернандеш эса бошқа клубга ўтишга мойил, деган хулосадан кейин қабул қилинган.

Хабарга кўра, мадридликлар аввалроқ «Лилль» таркибида тўп сураётган Аюб Буадди ва Дортмунднинг «Боруссия» клуби ярим ҳимоячиси Феликс Нмеча номзодларини ҳам кўриб чиққан. Бироқ Фернандес фойдасига асосий омил сифатида футболчининг ўзи Мадридга кўчиб ўтиш истаги тилга олинган.

Энцо Фернандес 2023 йилдан буён «Челси» шарафини ҳимоя қилмоқда. Ўтган мавсумда аргентиналик ярим ҳимоячи барча мусобақаларда жами 54 ўйинда майдонга тушиб, 15 та гол урди ва етти марта голли пас берди.

Эслатиб ўтамиз, Фернандес 2022 йил Қатарда ўтказилган жаҳон чемпионатида Аргентина терма жамоаси билан бирга дунё чемпионига айланган ва турнирнинг энг яхши ёш ўйинчиси деб топилган эди.