"Реал ТВ": “Ла Лига цирк ва кулгига қолган мусобақага айланди”

"Реал Мадрид" телевиденияси "Барселона"га қарши “эль-класико”дан кейин ҳакамликни кескин танқид қилди.

Гап Эрик Гарсиянинг Жуд Беллингемга нисбатан ишлатган ҳаракати ҳақида кетмоқда. Ушбу вазиятда “Реал” футболчиси жароҳат олган бўлса-да, ҳакам пенальти белгиламади.

"Ла Лига жиддий мусобақа эмас. Бу Тебас ва Негрейра лигаси. Бу цирк ва кулгига қолган ҳолат. Испан футболи учун уят.

Энг қизиғи — баҳсли вазият такрори кўрсатилмади. Агар у ерда муаммо бўлмаганида, эпизодни бемалол намойиш қилишарди. Биз Эрик Гарсиянинг тирсак билан зарбасини кўрдик — бу аниқ пенальти ва қизил карточка эди", — дейилди клуб телевидениеси эфирида.

Шунингдек, “Реал” ТВси трансляция режиссёрлари атайлаб айрим эпизодларни яшираётганини ҳам таъкидлади.