"Реал" ва "Манчестер Сити" бир футболчи учун кураш бошлади

"Реал" ва "Манчестер Сити" клублари "Бавария" ярим ҳимоячиси Кингсли Коман учун курашга қўшилди. Бу ҳақда Fussball News нашри хабар бермоқда.

Юқоридаги манбага кўра, испан ва инглиз грандлари 23 ёшли француз футболчисини яқинлашиб келаётган ёзги трансферлар даврида сотиб олишмоқчи. “Шаҳарликлар” Команни “Бавария”га ўтиши кутилаётган Лерой Санени ўрнини эгаллаши мумкин, деб ҳисоблайди.

Бундан аввал, Команга “Барселона”дан ҳам қизиқишлар бўлаётгани ҳақида хабарлар тарқалган эди.

Кингсли Коман жорий мавсум “Бавария” сафида 24 та ўйинда майдонга тушди ва 5 та гол ҳамда 5 та голли узатма ёздириб қўйишга эришди. Унинг мюнхенликлар билан амалдаги шартномаси эса 2023 йилга қадар имзоланган.