"Реал" ва Мбаппе ўртасидаги шартнома шартлари маълум бўлди

Мадриднинг "Реал" клуби раҳбарияти ПСЖ ҳужумчиси Килиан Мбаппе билан шартнома имзолашга яқин турибди. Бу ҳақда Инсайдер Жанлука Ди Марцио хабар бермоқда.

Маълумотларга кўра, 23 ёшли футболчи билан оғзаки келишувга эришилган. Манбада таъкидланишича, Мадрид клуби Килиан билан беш йиллик шартнома имзолайди.

Мбаппе барча солиқлардан ташқари йилига 25 миллион евро маош ишлаб топади. Шу билан бирга, у шартнома имзолагани учун тахминан 100 миллион евро бонус олиши кўзда тутилган.

Шартномага кўра, Килиан Мбаппе "Реал" Мадриднинг энг кўп маош олувчи футболчисига айланади. Айни пайтда бу борадаги энг яхши кўрсаткич Эден Азарда (14,5 миллион евро).

Мбаппенинг ПСЖ билан шартномаси 2022 йилнинг 30 июнига қадар амал қилади.