“Реал” Вальвердега катта нарх белгилади, “Сити” асосий харидор

Европанинг бир нечта клуби ярим ҳимоячи Федерико Вальверденинг жамоадоши Орельен Тчуамени билан муштлашувидан кейин Мадриднинг “Реал” жамоасини тарк этишини кутмоқда.

27 ёшли футболчининг эҳтимолий трансфери 100-120 миллион еврони ташкил қилиши мумкин. Бу ҳақда AS хабар бермоқда.

Манба маълумотига кўра, Вальверде учун курашда 2025 йил ёзидан бери уни кузатиб келаётган “Манчестер Сити” асосий фаворит ҳисобланади. Таъкидланишича, уругвайлик футболчининг ўзи “Қироллик клуби”ни тарк этишни истамаяпти.

Жорий мавсумда Вальверде барча мусобақаларда 48 та ўйинда қатнашиб, тўққизта гол ва 13 та голли узатма амалга оширди. Унинг клуб билан амалдаги меҳнат шартномаси 2029 йил ёзигача мўлжалланган.

Transfermarkt портали маълумотига кўра, футболчининг бозор қиймати 120 миллион еврони ташкил этади.