“Реал”: Холандни олмаймиз, ундан зўри чиқиб қолди!

Испания чемпионатининг энг бадавлат клуби “Реал” 2027 йилнинг ёзида амалга ошириладиган трансферлар режасини шакллантирмоқда. Мадрид клубида трансферларни бир неча йил олдиндан режалаштириш ва шунга кўра ҳаракат қилиш яхши анъанага айланган.

TEAMtalk маълумотига кўра, клуб учун устувор вариантлардан бири “Ливерпуль” ҳужумчиси Уго Экитике ҳисобланади.

23 ёшли форвард “Энфилд”даги муваффақиятли дебют мавсумидан сўнг “Қироллик клуби” эътиборини тортган. Франциялик тўпурар 42 ўйинда 17 та гол урди.

Қайд этилишича, “Реал” скаутлари Экитике атрофидаги вазиятни диққат билан кузатиб бормоқда.

Аслида “Реал” хўжайини Флорентино Перес жамоасига “Манчестер Сити” тўпурари Эрлинг Холандни олиб келишни анчадан бери мўлжаллаб юрган эди. Бироқ норвегиялик ҳужумчининг трансфери даъвогар жамоаларга камида 200 миллион еврога тушади. Бу сумма мадридликларни ҳам ўйлантириб қўймоқда.

Қолаверса, Эрлинг Холанднинг хизмат ҳақи Уго Экитикеникидан анча баланд ҳисобланади. Холанд Европадаги футболчилар орасида энг катта маош оладиган ўйинчилардан биридир.