“Реал” яна бир юлдуздан воз кечадиган бўлди

Испаниянинг энг қудратли клубларидан ҳисобланган “Реал” франциялик ярим ҳимоячи Эдуардо Камавинга билан маълум шартлар асосида хайрлашишга тайёрлигини билдирди.

Жамоани Хаби Алонсо қабул қилиб олганидан кейин таркибда муайян ўзгаришлар рўй бермоқда, испаниялик мутахассис жамоани ўзига мослаштиришга жуда катта эътибор қаратмоқда.

Defensa Central нашрининг ёзишича, “Қироллик клуби” Эдуардо Камавинга бўйича 80 миллион еврдан бошланган таклифларни кўриб чиқишга рози. Манбанинг таъкидлашича, франциялик ярим ҳимоячи Хаби Алонсонинг ишончини қозонган.

Бироқ клуб ғазнасига кирим қилиш керак. Шу боис, клуб Камавинга учун қиммат нарх белгилади. Аслида Transfermarkt портали экспертлари 22 ёшли футболчини 60 миллион еврога баҳолаган.

Камавинганинг мадридликлар билан тузган шартномаси 2029 йилнинг ярмигача давом этади. Ҳозирча, бу ўйинчи учун белгиланган суммани тўлашга тайёр бирор даъвогар чиқмади.