“Реал”да ўйнолмаган Трент Англияга қайтиб кетиши кутиляпти

“Реал” ўнг қанот ҳимоячиси Трент Александер-Арнольд Мадридга ёзда келганига қарамай, Мадрид клубини тарк этиши мумкин, чунки унга Англия Премьер-лигасининг учта клуби қизиқиш билдирмоқда.

Бу ҳақда Give me Sport нашри хабар берди.

Англиялик футболчи ўтган ёзда “Ливерпуль” билан хайрлашиб, “Реал”га эркин агент сифатида ўтган эди. Мадридликлар уни клублар ўртасидаги жаҳон чемпионатидан ўйнатиш мақсадида бир неча кун аввал қўлга киритиш учун мерсисайдликларга 10,5 миллион евро ўтказиб берганди.

Катта умидлар билан “Пеал”га олиб келинган Трент жароҳатлар ва бошқа бир қатор муаммолар туфайли янги жамоага тўлиқ мослаша олмади.

Манбага кўра, “Манчестер Сити”, “Манчестер Юнайтед” ва “Ньюкасл” тажрибали футболчининг атрофидаги вазиятни диққат билан кузатмоқда. Улар англиялик ҳимоячини Премьер-лигага қайтариш учун 40 миллион евро тўлашга тайёр.

Трент ҳозиргача ҳимоячи Ла Лигада саккизта, Чемпионлар лигасида эса учта ўйинда майдонга тушган. “Ливерпуль”да Александр-Арнольд юқори самарадорлиги билан ажралиб турган бўлса, Испанияда у ҳозирча фақат битта голли узатмага эга.