"Реал"га қарши баҳс олдидан "Барселона"нинг икки футболчиси сафга қайтди

"Барселона" ҳимоячиси Алехандро Бальде ва ярим ҳимоячи Марк Касадо Ла Лиганинг 35-турида Реал Мадридга қарши бўладиган ҳал қилувчи ўйинда иштирок этиш учун тиббий рухсатнома олишди. Бу ҳақда клуб ўзининг ижтимоий тармоқларида расман хабар берди.

Иккала ўйинчи ҳам жароҳатдан тузалган: Бальде апрель ойида тизза ости пайининг жароҳати туфайли сафдан чиққан эди. Касадо эса боғламлари шикастланганлиги сабабли икки ойга яқин майдондан ташқарида қолган эди.

Энди ҳар иккала футболчи ҳам мураббийлар штаби ихтиёрида бўлиб, келгуси ўйинда "кўк-анорранглилар" таркибини кучайтириши мумкин. Учрашув 11 май куни Барселонадаги "Олимпик Люис Компанис" стадионида бўлиб ўтади.