“Реал”нинг мағлубиятига сабабчи бўлган Камавинга тақдирга тан берди

Мадриднинг “Реал” клубида ярим ҳимоячи Эдуардо Камавингани сотиш эҳтимолини ёмон натижа сифатида қабул қилишмаяпти. Жорий мавсум 23 ёшли футболчи учун “ўзига хос якуний имтиҳон” бўлган ва у синовдан ўта олмаган.

Бу ҳақда AS журналисти Рубен Мартин X ижтимоий тармоғида хабар берди.

Манба маълумотига кўра, Камавинга Мадридда ўзини уйидагидек ҳис қилади, аммо француз футболчиси реалликни қабул қилиб, бошқа жамоалардан тушадиган таклифларни кўриб чиқишга тайёр.

Камавинга 2021 йилдан бери “Реал”да ўйнаб келмоқда. Унинг клуб билан амалдаги шартномаси 2029 йил ёзигача мўлжалланган. Transfermarkt маълумотига кўра, футболчининг бозор қиймати 50 миллион еврони ташкил қилади.

Яқинда Чемпионлар лигаси чорак финал жавоб ўйинида Камавинга учрашув якунланишига бир неча дақиқа қолганида майдондан четлатилди. Натижада бир ўйинчи кўп бўлиб қолган “Бавария” қисқа фурсатда иккита гол уриб, мағлубиятни ғалабага айлантирди.

Қитъанинг энг нуфузли мусобақасидан эрта чиқиб кетган “Реал” энди жамоада жиддий ўзгаришлар қилмоқчи. Хусусан, кейинги пайтда ўйинида пасайиш кузатилаётган Камавинга ҳам трансферга қўйилди.