Relevo: 2036 йилги Олимпиада Қатарда бўлади

Қатар пойтахти Доҳа шаҳри 2036 йилги Олимпия ўйинларига мезбонлик қилади. Қатарликлар ҳозирда Халқаро Олимпия қўмитаси билан бу бўйича якуний тафсилотларни мувофиқлаштирмоқда, деб хабар бермоқда Relevo нашри.

Ҳозирда 2028 йилги Олимпиада АҚШнинг Лос-Анжелес шаҳрида, 2032 йилдаги ўйинлар эса Австралиянинг Брисбен шаҳрида ўтказилиши белгиланган.

Қатар номзоди эса 10 йилдан ортиқ вақт давомида йирик спорт мусобақаларига мезбонлик қилгани учун кўриб чиқилди.

Доҳада 2006 йилда Осиё ўйинлари, 2011 йилда футбол бўйича Осиё кубоги, 2015 йилда гандбол бўйича жаҳон чемпионати, 2016 йилда велоспорт бўйича жаҳон чемпионати, 2018 йилда бадиий гимнастика бўйича жаҳон чемпионати, 2019 йилда енгил атлетика бўйича жаҳон чемпионати, 2022 йилда эркаклар ўртасида футбол бўйича жаҳон чемпионати, 2024 йилда сузиш бўйича жаҳон чемпионати бўлиб ўтган. 2027 йилда пойтахт баскетбол бўйича   жаҳон чемпионатига мезбонлик қилади.