Рейндерс собиқ жамоасига йўқ жойдан 14 миллион евро келтиради

Италиянинг “Милан” клуби собиқ ярим ҳимоячиси Тижани Рейндерснинг  трансфери орқали яна пул ишлаб оладиган бўлди.

Маълумки, ўтган ёзда нидерландиялик ярим ҳимоячини Милан клубидан олиб кетган “Манчестер Сити”  футболчини Саудия Арабистонининг “Ал-Қодисия” клубига сотишга розилик берди.

Бус авдо орқали миланликлар 14 миллион евро ишлаб олади. Бу ҳақда La Gazzetta dello Sport нашри хабар берди.

Нашр маълумотига кўра, нидерландиялик ярим ҳимоячи 2025 йил ёзида Италия клубидан Англия жамоасига ўтганида, келишувга муайян шартлар бажарилган тақдирда “шаҳарликлар” тўлаши шарт бўлган бонуслар киритилган эди.

Аммо шартномада Рейндерс жамоани бир мавсум ёки ундан кам вақт ўтгач тарк этса, “Манчестер Сити” бонусларнинг тўлиқ суммасини тўлаши кераклиги ҳақидаги банд ҳам бор эди. Шу тариқа, футболчи ушбу трансфер ойнасида “Ал-Қодисия”га ўтиши билан “россонерилар” 14 миллион евро олади.

Ўтган мавсумда Рейндерс барча мусобақаларда 47 та ўйинда қатнашиб, еттита гол урди ва саккизта голли узатмани амалга оширди. Футболчининг клуб билан амалдаги шартномаси 2030 йил ёзигача мўлжалланган. Transfermarkt портали маълумотига кўра, нидерландиялик футболчининг бозор қиймати 50 миллион еврога тенг.