Ривалдо: Бу бразилиялик мураббийлар учун ҳурматсизлик

1999 йилги "Олтин тўп" соҳиби, “Бунёдкор”нинг собиқ футболчиси Ривалдо Бразилия терма жамоасини бошқариш учун хориждан мураббий таклиф этилишига мутлақо қарши.

Эслатиб ўтамиз, Тите ЖЧ-2022 даги муваффақиятсизликдан сўнг истеъфога чиқарилди. Шу тариқа беш карра жаҳон чемпионлари мураббийсиз қолди. Ривалдонинг фикрича, унинг ўрнини фақат бошқа маҳаллий мутахассис эгаллаши мумкин.

“Мен хориждан мутахассис таклиф қилиш фикрига умуман қўшилмайман. Менимча, бу бразилиялик мураббийларимизга нисбатан ҳурматсизликдир. Қолаверса, бизда яхши мураббийлар кўп. Рожеро Чени, Ренато Гаучо, Кук, Фернандо Динитс, Доривал Жуниор. Қолаверса, чет эллик мураббий кейинги жаҳон чемпионатида ғалаба қозонишимизга кафолат бўла олмайди”, - деди Ривалдо ижтимоий тармоқдаги саҳифасида.