“Рома” футболчиси Қатарга боришдан бош тортди

“Рома” кашфиётларидан бири Кристиан Вольпато жаҳон чемпионатида иштирок этадиган Австралия терма жамоасининг чорловини қабул қилмади.

18 ёшли футболчи яқин келажакда Италия терма жамоаси бош мураббийи Роберто Манчинидан таклиф олишига ишонмоқда ва халқаро майдонда италияликлар шарафини ҳимоя қилишни маъқул кўряпти.

Вольпато Австарлиянинг “Western Sydney Wanderers” жамоаси тарбияланувчиси ҳисобланади ва Рим клубига 2020 йилнинг январида 116 минг евро эвазига кўчиб ўтганди. Кристиан Италиянинг 19 ва 20 ёшгача бўлган терма жамоаларига жалб қилинган ва жами еттита ўйинда иштирок этган.

Австралия терма жамоаси бош мураббийи Грэм Арнольд истеъдодли футболчисини миллий терма жамоа билан Қатарда бўладиган жаҳон чемпионатида қатнашишга таклиф қилиб, рад жавобини олди.