"Рома"нинг Конференциялар лигаси финалидаги рақиби - "Фейеноорд" ҳақида гаплашамиз

“Рома” ўз майдонида “Лестер”ни енгди ва 31 йиллик танаффусдан сўнг илк бор еврокубоклар финалига чиқди. Жозе Моуриньо бошқарувидаги жамоа 25 май куни бўладиган ҳал қилувчи баҳсда Нидерландиянинг “Фейеноорд” клубига қарши майдонга тушади. Хўш, “бўрилар”нинг финалдаги рақиби қандай жамоа? Қуйида шу ҳақда сўз юритамиз.

“Фейеноорд” 1908 йил 19 июлда ташкил этилган. Жамоа Роттердам шаҳри шарафини ҳимоя қилади. Клуб турли йилларда “Вилхелмин”, “Хиллеслёйс” РВВ “Селеритас”, деб номланган. Чет элликларга талафузда осон айтилиши учун 1973 йилда жамоага “Фейеноорд” номи берилган.

“Фейеноорд” “Аякс” ва ПСВ каби Нидерландиянинг гранд клублари қаторига киради. УЕФА клублар рейтингида 57-ўринда.

“Фейеноорд”нинг эришган ютуқлари:

Нидерландия чемпиони (15)

1923/24, 1927/28, 1935/36, 1937/38, 1939/40, 1960/61, 1961/62, 1964/65, 1968/69, 1970/71, 1973/74, 1983/84, 1992/93, 1998/99, 2016/17.

Нидерландия кубоги соҳиби (13)

1930, 1935, 1965, 1969, 1980, 1984, 1991, 1992, 1994, 1995, 2008, 2016, 2018.

Нидерландия Суперкубоги соҳиби (4)

1991, 1999, 2017, 2018.

Европа чемпионлар кубоги ғолиби (1)

1970.

УЕФА Кубоги ғолиби (2)

1974, 2002.

Қитъалараро кубок соҳиби (1)

1970.

Интертото кубоги соҳиби (1)

1961/62.

Арне Слот бошчилигидаги жамоа Конференциялар лигаси финалига мағлубиятсиз йўл олди: 9 ғалаба ва 4 дуранг. Роттердамликлар мусобақанинг “E” гуруҳида баҳс олиб боришди ва якунда 1-ўрин билан плей-оффга йўл олди. Улар нимчорак финалда “Партизан”, чорак финалда “Славия Прага” ва ярим финалда “Марсель”ни мағлуб этди.

Гарчи “Фейеноорд” Эредивизияда чемпионлик пойгасидан чиқиб кетган бўлсада, ҳужум бўйича энг яхши кўрсаткичга эга. Ушбу жамоа Конференциялар лигасида киритилган голлар сони бўйича биринчи ўринни эгаллаб турибди – 28 та. Бу борада кейинги кўрсатгич финалдаги бўлажак рақиб - “Рома”га тегишли (27 та).

"Рома" футболчилари финалда “Фейеноорд”нинг колумбиялик ҳужумичиси Луис Синистерра ва бельгиялик ҳужумчиси Сирил Дессерсга кўпроқ эътибор қаратиши керак.

22 ёшли Синистерра ажойиб техника ва ажойиб тезликка эга ҳужумчи ҳисобланади. У еврокубокларда 11 та ўйинда майдонга тушиб, 6 та гол урди ва 4 та голли узатмани амалга оширди. Қолаверса, у 23 та гол билан жамоанинг жорий мавсумдаги энг яхши тўпурари бўлиб турибди.

Асли “Генк” футболчиси ҳисобланган ва мавсумни “Фейеноорд”да ижарада ўтказаётган 27 ёшли Дессерс Конференциялар лигасининг энг яхши тўпурари бўлиб турибди. У ўз ҳисобига 10 та гол ёздириб қўйишга эришди. “Рома”нинг асосий ҳужумчиси Тэмми Абрахам эса ушбу мусобақада 9 та гол урган.

Нидерландия чемпионати ўта рақобатбардош турнир бўлмаса-да, “Фейеноорд” бу мавсум ҳозирча 31 та ўйинда 72 та гол урди. Жамоа Эредивизияда голлар сони бўйича учинчи ўринда бормоқда.

“Фейеноорд”нинг ҳимоя чизиғи ҳам ўта барқарор ҳисобланади. Роттердамликлар ўз дарвозаларидан бор йўғи 19 та гол ўтказиб юборган. Бу борада улар 2-ўринда.

“Фейеноорд” ҳақида энг қизиқарли факт: мухлислар шарафига жамоанинг 12-рақами ҳеч кимга берилмайди.

Эслатиб ўтамиз, УЕФА Конференциялар лигаси финал учрашуви  Албания пойтахти Тирана шаҳрида жойлашган “Арена Комбетаре” стадионида бўлиб ўтади. Ўйин 25 май куни Тошкет вақти билан соат 00:00 да бошланади.