Романо: Винисиус «Реал» билан шартномани узайтиради

Бразилия терма жамоаси ҳужумчиси Винисиус Жуниор яқин кунларда «Реал» билан шартномасини узайтириши кутилмоқда. Бу ҳақда спорт журналисти Фабрицио Романо ўзининг ижтимоий тармоқдаги саҳифасида хабар берди.

Манбага кўра, футболчига клуб томонидан таклиф этилган янги шартлар маъқул келган, ҳозирча фақат айрим майда-чуйда жиҳатлар юзасидан келишув қолган.

ОАВ тарқатаётган маълумотларга кўра, Винисиуснинг «қироллик клуби» билан янги шартномаси 2031 йилгача мўлжалланаётган. Янги битимга биноан, у ҳар бир мавсум учун 28 миллион евро маош олиши режалаштирилган.

Винисиус Жуниор ҳозирга қадар «Реал» сафида барча мусобақалар доирасида 375 та ўйин ўтказган. У шу вақт мобайнида 128 та гол урган ва жамоадошларига 100 бор ҳал қилувчи пас берган.

Аввалроқ Винисиус Жуниорга Лондоннинг «Арсенал» клуби жиддий қизиқиш билдиргани ҳақида ҳам хабарлар тарқалган эди.