Роналдиньо иккинчи Месси бўлиши башорат қилинган ўғлини “Барселона”га таниш-билиш орқали жойлади?!

Роналдиньо “Барселона”ни тарк этганига 15 йил бўлди. Бу вақт оралиғида чарм тўп устаси клуб билан ўртадаги алоқаларни узиб юборгани йўқ. Турли тадбирлар, ўртоқлик ва хайрия ўйинлари чоғида Каталония ишқибозлари олдида доимий равишда кўриниш берди. Бежизга унинг ўғли ҳам Каталонияни танлагани йўқ.

17 ёшли Жоао Мендес де Ассис Морейра бир неча ҳафтадан бери “Барса”нинг 19 ёшгача бўлган жамоаси кўригида бўлиб турибди. Маълумотларга қараганда, "Ла Масия" академияси мураббийлари Роналдиньонинг ўғли кўрсатган ўйиндан ҳайратда қолгани йўқ. Шу боис, афсонанинг шахсан ўзи ўғлининг ўйинини мураббийлар томоша қилиши учун ўртоқлик учрашуви ташкил этди. Бундан сўнг Хавьер Савиола бошчилигидаги мураббийлар штаби Жоао Мендес билан шартнома тузишга қарор қилди. Шунга қарамай, улар футболчининг Каталония академиясидан “ёриб” чиқиши эҳтимолини жуда паст эканлиги ҳақида кўп бор таъкидлашмоқда. Бу келишувни имзолашда бош-қош бўлган клуб президенти Жоан Лапорта эса, Роналдиньонинг фарзанди иккинчи имкониятни қўлдан чиқариб юбормаслигига ишонмоқда. Худди, Мендеснинг отаси сингари.

Жоао – 178 см бўйга эга ҳужумчи. Шунингдек, вингер ва ҳужум ортидаги ярим ҳимоячи позицияларида ҳам тўп суриши мумкин. Скаутларнинг айтишича, майдондаги ҳаракатлари отасини эслатиб юборар эмиш. Қаҳрамонимиз ўзининг футболдаги илк қадамларини “Фламенго”да ташлади. Кейинроқ, ПСЖнинг Бразилиядаги академиясига кўчиб ўтди. У ерда Мендес иқтидорли эканлигини кўп бор таъкидлашганига қарамай, Парижга таклиф этишгани йўқ. Натижада, 13 ёшли бўлажак футболчи “Крузейро” клуби ёшлари сафига бориб қўшилди. Бу келажакда яхшигина активга айланишини ҳис қилган клуб 2025 йилга қадар тузилган шартнома таклиф этади. U14 жамоаси сафида Хитойда ўтган мусобақани “ёндирган” Жоао тезда машҳур бўлиб кетди. Унинг афсонавий Роналдиньонинг ўғли эканлиги бунда катта роль ўйнагани аниқ, бироқ йигитча ҳам чакки эмас эди. ПСЖ бу сафар уни Парижга чорлади, бироқ 15 ёшли болакай Бразилияда қолишни афзал кўрди. Бу орада, "Nike" компанияси у билан ҳомийлик шартномасини имзолади.

Афсуски, вақт ўтган сари унинг тенгдошлари жисмонан бақувватлашиб борди. Уларнинг фонида техникаси кучли қилтириқ йигитнинг ажралиб туриши мураккаблашиб кетди. Натижада, ўтган йилнинг бошида “Крузейро” ўртадаги шартномани бекор қилди. Мана бир йилдир-ки, Жоао Мендес ўзи учун жамоа излаш билан банд. Ваҳоланки, Хитойдаги мусобақадан сўнг “Барселона” скаутлари уни бўлажак Месси деб эътироф этишган эди. Ҳозир “кўк-анорранглилар” уни жамоага қабул қилган, бироқ ҳали тиббий кўрикдан ўтгани йўқ. Ишга Роналдиньонинг қалин дўсти – Жоан Лапорта аралашганини инобатга олсак, йигитча “Барса” билан деярли келажагини боғлади. Энди аравани тортиб кетиш тўлиқ унинг ўзига боғлиқ.