Роналду “Ан-Наср”да кетиш ва фаолиятини якунлашга қарор қилди

Жаҳон футболида энг кўп гол урган беш карра “Олтин тўп” соҳиби Криштиану Роналду “Ан-Наср”ни тарк этиш ва футболчилик фаолиятини якунлашга қарор қилди.

Журналист Бен Жейкобс ижтимоий тармоқларда маълум қилишича,  февралда 41 ёшни қарши оладиган футболчи клуб билан шартномани узайтирмайди ва 2027 йил ёзида карьерасини тугатганини расман эълон қилади.

Манбага кўра, “Ан-Наср” раҳбарияти Роналдуни камида яна бир мавсумга қолдиришга уриниб кўради. Агар бунинг имкони бўлмаса, клуб уни Саудия Арабистонида сақлаб қолиш мақсадида қўшма мулкчиликдаги улушини 15 фоизгача оширишни таклиф қилишга тайёр.

Криштиану Роналду “Манчестер Юнайтед” билан шартномаси бекор бўлгач, 2023 йилнинг бошида эркин агент сифатида “Ан-Наср” билан шартнома имзолаган. Ҳозиргача у клуб сафида 125 та ўйинда иштирок этиб, 110 та гол урган ва 22 та голли узатма берган.

Унинг амалдаги шартномаси 2027 йил ёзигача мўлжалланган, Transfermarkt эса уни 12 миллион еврога баҳоламоқда.