Роналду Европага қайтадиган бўлди! Навбатдаги жамоаси тайин...

Жаҳон футболида энг кўп гол урган Криштиану Роналду фаолиятида яна кескин бурилиш бўлиши кутилмоқда. “Ан-Наср” билан амалдаги шартномаси ярим йилдан кейин якунланадиган 39 ёшли футболчи айни пайтда расман бошқа клублар билан музокара ўтказиш ҳуқуқига эга.

El Gol Digital нашри футбол афсонаси Европага қайтишга тайёрлигини маълум қилди. Гранд клублари ҳали Роналдуга иш таклиф қилишга шошилмаяпти. Бироқ футболчи профессионал фаолиятини бошлаган “Спортинг” моҳир тўпурар ёрдамига муҳтож.

Футбол экспертлари Криштиану Роналду узоқ давом этган профессионал фаолиятини ўзини тарбиялаган “Спортинг”да якунлаши мантиқан тўғри бўлишини таъкидламоқда.

Роналду “шерлар” таркибда 31 та учрашувда бешта гол урганидан кейин 19 миллион евро эвазига “Манчестер Юнайтед”га трансфер қилинган. Орадан 22 йил ўтиб, моҳир тўпурар яна қадрдон клубига қайтиши кутиляпти.