Роналду фаолиятини якунлаганидан кейин нима қилишини айтди

Португалия миллий терма жамоаси ва  Саудия Арабистонининг “Ан-Наср” клуби ҳужумчиси Криштиану Роналду футболчилик фаолиятини якунлаганидан кейинги режалари ҳақида сўзлади.

- Келажагим аллақачон режалаштирилган. Мени банд қилиб турадиган ишлар кўп, шунинг учун фақат битта нарсани айтиш қийин. Футболдан кейин катта бўшлиқ пайдо бўлиши мумкин ва уни фақат битта эмас, турли йўллар билан тўлдириш керак.

Кўпроқ ҳордиқ чиқариш, саёҳат қилиш, томоша қилиш ва мен жуда яхши кўрадиган падел ўйини билан шуғулланишни хоҳлайман. Шунингдек, эришган ютуқларимдан, рафиқам билан эришган нарсаларимиздан баҳраманд бўлишни давом эттираман, -  деди Роналду Vogue нашрига.

Ўтган мавсумда 41 ёшли ҳужумчи клуб сафида барча мусобақаларда 37 та ўйин ўтказиб, 30 та гол ва 3 та ассист қайд этди.

2026 йилги жаҳон чемпионатида Роналду Португалия терма жамоаси сафида 5 та ўйинда майдонга тушиб, 3 та гол урди.

Криштиану Роналду – Европа Чемпионлар лигасининг беш карра ғолиби, 2016 йилги Европа чемпиони ва Миллатлар лигасининг икки карра ғолиби. У миллий жамоалар тарихидаги голлар сони, Европа чемпионатлари, Чемпионлар лигаси ва клублар ўртасидаги жаҳон чемпионатидаги голлар бўйича қатор рекордлар соҳиби ҳисобланади. Шунингдек, у 5 марта “Олтин тўп” соврини билан тақдирланган.