Роналду иккинчи ўйинни ҳам бойкот қилиши мумкин — клубдан кетиш эҳтимоли бор

"Ан-Наср" ҳужумчиси Криштиану Роналду клуб бошқарувига оид масалалар юзасидан норозилиги сабаб кетма-кет иккинчи ўйинни бойкот қилиш ниятида. "ESPN" нашрининг хабарига кўра, у Саудия Арабистони Суверен жамғармаси (PIF) клуб бошқарувида ўзгаришлар киритиш бўйича аниқ кафолат бермаганидан норози.

Агар яқин ҳафталар ичида вазият бўйича кафолатлар тақдим этилмаса, Роналду июнь ойида клубдан кетишни сўраши мумкин. Жума куни "Ан-Наср" "Ал-Иттиҳод"га қарши майдонга тушади.

Аввалроқ 40 ёшли португалиялик ҳужумчи Саудия чемпионати доирасидаги "Ал-Рияд"га қарши ўйинни (1:0) ўтказиб юборгани хабар қилинганди. Шунингдек, у ўйиндан кейинги машғулотларда ҳам иштирок этмагани айтилган.

Манбаларга кўра, Роналду PIF’нинг клубни рақобатчилар, хусусан "Ал-Ҳилол"га нисбатан бошқариш услубидан норози. Унинг фикрича, жамғарма сиёсатлари жамоанинг чемпионлик учун курашишига тўсқинлик қилмоқда. Шу боис, у ёзда МЛС ёки Европа лигаларидан бирига ўтиш имкониятини ҳам кўриб чиқиши мумкин.

Бундан ташқари, Роналду Карим Бенземанинг "Ал-Ҳилол"га ўтишига "рақобатга зарар етказади" деган важ билан қарши чиққанини билдирувчи хабарлар ҳам тарқалган эди.