Роналду жамоасига “Реал” юлдузини олиб келадиган бўлди

Португалия терма жамоаси етакчиси Криштиану Роналду Мадриднинг “Реал” клуби марказий ҳимоячиси Антонио Рюдигерни “Ан-Наср”га олиб келиш ташаббусини билдирди.

Бу ҳақда Fichajes нашри маълумот берди.

Германиялик футболчининг “Қироллик клуби”даги келажаги мавҳум бўлиб турибди. 32 ёшли футболчининг испан клуби билан амалдаги шартномаси июнь ойида якунланади ва айни дамда томонлар янги келишув бўйича муросага кела олгани йўқ.

Шу сабабли, футболчи январь ойидаёқ бошқа клублар билан эркин музокара олиб бориш ҳуқуқига эга бўлди.

Рюдигер атрофидаги вазият “Ан-Наср” эътиборини тортди ва унга бўлган қизиқишни кучайтирди.  Саудия клуби Рюдигерни ҳимоя чизиғини мустаҳкамлаш учун муҳим номзод сифатида кўрмоқда ва узоқ муддатли ҳамкорликка мўлжалланган таклиф тайёрлаяпти.

Қайд этилишича, бу трансферда “Ан-Наср” юлдузи Криштиану Роналду муҳим роль ўйнамоқда. Чунки клубга немис футболчисини айнан унинг ўзи тавсия қилган.

Рюдигер 2022 йилдан бери Мадидда тўп суриб келади ва жамоа ҳимоясининг асосий футболчиларидан бири ҳисобланади.

 Шу билан бирга, мадридликлар  одатда 30 ёшдан ошган ўйинчилар билан шартномани узайтириш масаласида эҳтиёткор сиёсат юритади, бу эса вазият ривожига таъсир кўрсатиши мумкин.