Роналду журналистларга қаттиқ жавоб қайтарди: "Савол берганда кўзимга қаранг!"

"Ан-Наср" ва Португалия терма жамоаси ҳужумчиси Криштиану Роналду Данияга қарши ўйиндан олдинги матбуот анжуманида журналистни танқид қилди.

Мухбир Португалия терма жамоасига ва унинг бош мураббийи Роберто Мартинесга қаратилган танқидлар ҳақида савол берди.

Бунга жавобан Роналду ОАВ терма жамоа атрофида ҳаддан ташқари кўп негатив муҳит яратаётганини таъкидлади:

"Баъзи саволларингиз шунчаки ҳурматсизлик. Агар мендан жавоб олишни истасангиз, савол берганингизда кўзимга қаранг", – деди 40 ёшли футболчи.

У, шунингдек, журналистдан жавоблари вақтида компютерга қарамасликни талаб қилди ва агар керак бўлса, буни ўн марта такрорлашга тайёр эканини айтди.

Миллатлар Лигаси чорак финалининг жавоб учрашуви бугун бўлиб ўтади. Биринчи учрашувда Дания 1:0 ҳисобида Португалия устидан  ғалаба қозонган эди.