Роналду Машариповга: Нима, сен Мессининг мухлисимисан?!
“Nobel” YouTube-канали 2026 йилги жаҳон чемпионатига йўлланма олган Ўзбекистон миллий терма жамоаси футболчилари билан суҳбатларни эълон қилиб бормоқда.
Ушбу канал муаллифи Жалолиддин Машариповдан “Ан-Наср”да легионеримиз билан бирга ўйнаган жаҳон футболи афсонаси Криштиану Роналду ҳақида сўради.
Таъкидлаш жоизки, Машарипов 2021-2023 йиллар Саудия Арабистони чемпионатида “Ан-Наср” шарафини ҳимоя қилиб, ушбу клубда 40 та ўйин ўтказган.
- Роналду жамоадош сифатида қандай?
- Жуда ажойиб йигит. Одамлар уни телевизорда кўрганида, уни такаббур, деб ўйланади. Аслида у оддий, яхши инсон, ҳаммани ҳурмат қилади.
- Сен ундан Ўзбекистон ва маҳаллий футбол ҳақида нималарни билишини сўрадингми?
- У менга Тошкентда бўлганини гапириб берган. Уни мастер-классга олиб келишган эди, мен ўшанда ёш бола бўлганман.
У “Ан-Наср”га келганида мен у билан бир ҳафтача гаплашмагандим. Олдига келиб, нималарнидир гапириб ўтирмадим. Бу тўғри бўлмасди. Кутдим.
Бир куни у мени чақириб, “Қалайсан? Ҳаммаси яхшими?”, деди. “Ҳаммаси жойида”, дедим. У менга “Сен Мессининг фанатимисан?” деб қолди. “Нега бундай деяпсан?” деб сўрадим. Роналду “Унда нега мен билан гаплашмаяпсан”, деди.
- Роналду “Ан-Наср”га келганида 7-рақамни беришни истамаган экансан...
- Йўқ, бу ёлғон. Мен клуб президенти чақирди, Роналду билан музокара ўтказилаётгани ва у келиши мумкинлигини айтди. Мен агар бу иш амалга ошса, унга 7-рақамни беришим кераклигини дарров тушундим. Мен уни ҳурмат қиламан.
Унга 7-рақамни беришни истамаганим, Роналду мени жамоадан кетказмоқчи бўлгани ҳақида чиққан гап-сўзларнинг ҳаммаси уйдирма.
Осиё Чемпионлар лигасида “Ан-Наср”га қарши ўйнадик. Криштиану Роналдунинг ўзи олдимга келди ва жуда яхши гаплашди. У ҳам ҳурматимни жойига қўяди.
Эслатиб ўтамиз, 31 ёшли Жалолиддин Машарипов “Пахтакор” тарбияланувчиси ҳисобланади. Ўзбекистонда “Локомотив” жамоаси сафида ҳам тўп тепган. Тажрибали футболчи айни пайтда Эроннинг “Истиқлол” клуби аъзоси ҳисобланади.
Машарипов легионер сифатида “Истиқлол”га қадар Бирлашган Араб Амирликларининг “Шабаб Ал-Аҳли”, Грециянинг “Пенсарраикос” ва Саудия Арабистонининг “Ан-Наср” жамоаларида ўйнаган.
Жалолиддин 2016 йилдан бери Ўзбекистон миллий терма жамоаси аъзоси ҳисобланади ва халқаро майдонда 74 та учрашувда қатнашиб, ўз ҳисобига 13 та гол ёздириб қўйган.
Фикрлар