Роналду олиш учун борини берадиган клуб номи ошкор бўлди

Беш карра “Олтин тўп” соҳиби Криштиану Роналду жорий мавсум якунланганидан кейин ҳозирги жамоаси “Ан-Наср”дан кетиши мумкин.

Fichajes нашрининг ёзишича, Саудия Арабистонининг амалдаги чемпиони “Ал-Ҳилол” қирқ ёшли футболчини ўз сафига қўшиб олиш учун бор имкониятини ишга солишга белбоғлаган.

Клуб раҳбарияти ФИФА янги форматда ташкил этаётган клублар ўртасидаги жаҳон чемпионатида Роналду айнан “Ал-Ҳилол” шарафини ҳимоя қилишини истаяпти. Улар машҳур юлдузнинг трансфери клуб имиджини кўтаришга хизмат қилади, деган фикрни илгари  сурмоқда.

 Сўнгги маълумотларга қараганда, “Ан-Наср” билан амалдаги шартномаси 30 июнь куни тугайдиган португалиялик юлдузнинг ўзи янги мусобақада қатнашиш иштиёқи жуда баланд. Клублар ўртасидаги жаҳон чемпионатининг бошқа иштирокчилари ҳам Роналдуни қисқа фурсатга бўлса-да, ўз таркибига қўшиб олишга ҳаракат қилаётгани ҳақида хабарлар тарқатилган эди.