Роналду қаерда ўйнайди? Қийин танлов қиладиган пайт келди

Жаҳон футболида энг кўп – 936 та гол урган Криштиану Роналдунинг “Ан-Наср” билан амалдаги шартномаси 30 июнь куни якунланади.

Айни пайтда 40 ёшли ҳужумчи ФИФАнинг янги форматдаги жаҳон чемпионатида қатнашадиган клублардан қисқа муддатли шартнома бўйича таклиф олмоқда.

Бироқ Роналду фаолиятини яна давом эттирмоқчи ва узоқ муддатли битим кутяпти.

Footmercato нашрининг ёзишича, португалиялик тўпурар олдидаги вариантлар орасидан иккитаси алоҳида аҳамиятга эга.

Биринчиси,  “Ан-Наср” раҳбарияти ўз юлдузига янги битим бериб бўлди ва Роналдунинг якуний жавобини кутмоқда.

Иккинчиси, Неймар билан хайрлашганидан кейин машҳур юлдузлардан бирини олишга бел боғлаган “Ал-Ҳилол” бу масалани Роналду ёрдамида ҳал қилмоқчи. “Ал-Ҳилол”нинг клублар ўртасидаги жаҳон чемпионатида иштирок этиши бу жамоага устунлик бериши айтиляпти.

Чунки Роналду ФИФАнинг тарихий янги мусобақасида иштирок этишни орзу қиляпти ва “Ан-наср”дан фарқли равишда “Ал-Ҳилол” унга бу имкониятни тақдим эта олади.