Роналду шайхларга “Барса”дан ўйинчи топиб берди

“Ан-Наср” билан амалдаги келишувини яна икки йилга узайтирган 40 ёшли Криштиану Роналду жамоани кучайтириш учун клуб раҳбариятига Европадан янги ўйинчи олишни тавсия қилмоқда.

Гап “Барселона”нинг энг тажрибали ўйинчиларидан ҳисобланган Андреас Кристенсен ҳақида кетмоқда. Роналду даниялик футболчини “Ан-Наср”га тўп тепишини истаяпти.

Табиийки, саудиялик шайхлар Роналдунинг талабини беэътибор қолдирмайди. Улар Каталония клуби раҳбариятига расмий таклиф тайёрляпти.

Кристенсен 2022 йили эркин агент сифатида “Челси”дан келганидан кейин “Барселона” ҳимоя чизиғини шакллантиришда муҳим фигуралардан бири бўлди. Даниялик марказий ҳимоячи жамоа ҳимоясида барқарорликни таъминлай олишини инобатга олган Роналду Кристенсен ёрдамида совринлар учун курашмоқчи.

29 ёшли футболчининг “Барселона” билан шартномаси келаси ёз тугайди. Каталонияликлар ҳали унга янги шартнома бергани йўқ. Шу боис, экспертлар Роналду режалаштирган трансфер амалга ошишига ишонмоқда.