Роналду тарихий маррага яна икки қадам ташлади

Бутун дунё футбол жамоатчилиги Криштиану Роналду қачон профессионал фаолиятида 1000 та гол уришини кутмоқда. 40 ёшли футболчининг ҳозирги ҳолати ва самарадорлиги уни тарихий маррага тобора яқинлаштириб бормоқда.

Роналду Саудия Араьистони чемпионатининг навбатдаги турида “Ал-Уҳдуд” жамоаси дарвозасини биринчи бўлимнинг ўзида икки маротаба ишғол қилиб, фаолиятидаги 955 ва 956-голларини нишонлади.

Шуни таъкидлаш жоизки, учрашувнинг 66-дақиқасида Роналду хет-трик қайд этиши ҳам мумкин эди, аммо португалиялик футболчининг учинчи голи офсайд сабабли ҳакам томонидан бекор қилинди.

Якунда “Ан-Наср” 3:0 ҳисобида йирик ғалабага эришди. Учинчи гол сўнгги дақиқада  Жоау Феликс томонидан киритилди.

Шу тариқа, “Ан-Наср” чемпионатда қаторасига ўнта учрашувни ҳам ўз фойдасига ҳал қилди. Криштиану Роналдунинг жорий мавсумда урган голлари сони 12 тага етди. У тўпурарлар пойгасида жамоадоши ва ҳамюрти Жоау Феликс билан бирга пеўқадамлик қиляпти.