Ronalduga yana uttizta gol zarur

Portugaliya milliy terma jamoasi va Saudiya Arabistonining “An-Nasr” klubi sharafini himoya qilayotgan Krishtianu Ronalduni professional faoliyatidagi 970-golini urdi.

Ronalduni Saudiya Pro-ligasining 30-turida “Al-Ahli”ga qarshi bahsning 76-daqiqasida hisobni ochib, jamoasining 2:0 hisobidagi g‘alabasiga hissa qo‘shdi.

Shu tariqa, Krishtianu futbol jamoatchiligi kutayotgan tarixiy voqea – umumiy gollari sonini mingtaga yetkazish uchun yana o‘ttizta gol qoldi.

41 yoshli yulduz jahon futbolida eng ko‘p to‘p kiritgan futbolchi hisoblanadi.

Ronaldu 2023 yildan buyon “An-Nasr” sharafini himoya qilib kelmoqda. Joriy mavsumda 41 yoshli forvard Pro-ligada 26 o‘yinda 25 ta gol va 2 ta golli uzatma amalga oshirgan.

“An-Nasr” Saudiya Arabistoni chempionati turnir jadvalida birinchi o‘rinni saqlab turibdi. Jamoa 30 o‘yinda 79 ochko to‘plagan. Ikkinchi o‘rindagi “Al-Hilol” bilan o‘rtadagi farq 8 ochkoni tashkil etadi, raqibda esa bitta zahira o‘yini bor.