Россия МТЖ мураббийи Ўзбекистонга қарши эҳтимолий ўйин ҳақида: "Режалаштириляпти" ёхуд Валерий Карпин SPORTS.UZ сайтига нима деганди?

Сўнгги кунларда миллий терма жамоамиз билан боғлиқ хабарлар кўпчиликни қулоғига чалиняпти. Айниқса, Россия терма жамоасига қарши назорат учрашуви ўтказилиши мумкинлиги ҳақидагиси алоҳида мавзуга айланяпти.

Сречко Катанец бошқараётган терма жамоамиз 16 ноябрь куни Тошкентда Магомед Адиев бош мураббийлигидаги Қозоғистон терма жамоасига қарши ўртоқлик учрашувида майдонга тушишидан хабарингиз бўлса керак.

Унгача вакилларимиз сентябрь ойининг 23 ва 27-саналарида Жанубий Кореяда Камерун ва Коста-Рика терма жамоалари билан баҳс олиб боргани ёдингизда бўлса керак. Ўшанда терма жамоамиз бир ғалаба ва бир мағлубият қайд этганди. Энди ноябрь ойидаги ўртоқлик учрашувларига навбат етиб келмоқда.

Демак, юқоридаги мавзуга тўхталмоқчимиз. Ўзбекистон ва Россия терма жамоалари ўртасидаги учрашув ростдан ўтказиладими? Агар бу ўйин тасдиқланса, илк бор икки терма жамоалар иштирокидаги учрашувга гувоҳ бўламиз ва бу ўзига яраша тарихий аҳамият касб этмасдан қолмайди. Аммо ҳозирча бу хабар расман тасдиғини топгани йўқ. Ҳозирча россияликлар 17 ноябрь куни Душанбеда Тожикистон терма жамоасига қарши майдонга тушишини расман тасдиқладилар.

24 сентябрь куни Валерий Карпин бошқараётган Россия Бишкекда Қирғизистонга қарши ўртоқлик ўйинини ўтказиб 1:2 ҳисобида ғалаба қозонганини биламиз. Ҳозирги вазиятдан келиб чиқиб, Россия Марказий Осиёдаги терма жамоалар билан назорат учрашувлари ўтказишга эътибор қаратганини айтиш мумкин.

Ёдингиздами, июнь ойида Россия терма жамоаси бош мураббийи Валерий Карпин Sports.uz сайти учун эксклюзив интервью берганди. ("Шомуродов яхши ўйин кўрсатса, дарҳол унинг рақамини тераман, Ўзбекистон билан ўйин? Бу таклифга кўнган бўлардим". Валерий Карпин SPORTS.UZ сайтига берган интервьюсида яна нималарни айтди?) Ўша суҳбатда ундан миллий терма жамоамизга қарши ўртоқлик учрашуви ташкил этилиш эҳтимоли қанчалик эканлиги ҳақида сўрагандик. Валерий Георгиевичнинг жавоби шундай бўлганди:

“Бу масалада ҳаммасини бир ўзим ҳал қилмайман. Боз устига бу менинг ваколатим доирасига кирмайди. Буни федерациядагилар ҳал этишади. Агар бунинг иложи бўлиб, федерациядагилар шуни танлашса, мен жон деб бу таклифга кўнган бўлардим. Кечирасизу, бу саволингизни менга эмас, федерацияда ишлайдиганларга берганингиз маъқулроқ”.

Карпин терма жамоамизни билади ва кузатиб ҳам борган, буни қуйидаги сўзлари орқали билиб олишингиз ҳам мумкин.

“Илгари кузатардим, бироқ охирги пайтларда бунга қўл тегмаяпти. Шомуродов “Ростов”да ўйнаб юрган кезларида терма жамоангиз ўйинини доим кузатардим”.

Орадан шунча вақт ўтиб, энди чиндан ҳам Ўзбекистон ва Россия термалари ўртасида халқаро ўртоқлик учрашуви ўтказилиши ҳақиқатга яқинроқ бўлиб турибди. Карпин ҳам биз билан ўйин ўтказишга қарши бўлмаганини унинг юқоридаги фикрлари орқали пайқаган бўлсангиз керак-а? Бу ўйин икки томон учун ҳам фақат фойдали бўлади.

Биз ушбу вазиятга янада ойдинлик киритиб олишимиз зарур эди. Чунки қуруқ гап билан чекланиб қолмасликни истадик. Шу боис Россия терма жамоасининг мураббийлар штабида Валерий Карпинга яқиндан кўмаклашиб келаётган Виталий Кафанов билан боғландик. Чунки ростдан ушбу учрашувнинг амалда ташкил этиш эҳтимоли қанчалик? Буни билишимиз муҳим эди. Шу сабабли Виталий Витальевичдан Россиянинг Тошкентда Ўзбекистонга қарши учрашуви ўтказилиши мумкинми, деб сўраганимизда, мутахассис “режалаштириляпти”, деган жавобни айтди. Демак, бу қуруқ гап эмас ва ҳозирда музокаралар давом эттириляпти. Тўғри, ҳали расман тасдиқлангани йўқ, балки тез орада ҳаммаси ижобий ҳал бўлар, кутамиз!

Шуҳратбек Жўраев.