"Рости, тугатмоқчи эдим" - "Кекса" ҳужумчи Баҳодир Насимов фаолиятини яна давом эттиришига нима сабаб?

Келаси йили 38 ёшни қаршилайдиган “кекса” ҳужумчи Баҳодир Насимов ҳали бутсаларини михга илишга шошилмаяпти. Кўпчилик уни мавсум якунлангач, фаолиятини тугатиши тахмин қилинганди. Аммо воқеалар ривожи бундай тус олгани йўқ. Яқинда Насимов “Динамо” клуби билан 2025 йилнинг охирига қадар шартномани узайтирганлиги эълон қилинди.

Насимов якунига етаётган мавсумда “Динамо” таркибида Суперлига ва Кубок баҳсларида ҳаммаси бўлиб 11 та учрашувда майдонга тушди. 1 та голли узатма берди. Баҳодир “Динамо” билан шартномасини узайтирганидан кейин Sports.uz сайтига интервью берди.

- “Динамо” клуби билан шартномани яна узайтирдингиз. Аввало, шу хусусида тўхталиб ўтсангиз, янги таклиф билдирилишини кутганмидингиз?

- Ростини айтганда, кутмагандим. Лекин бош мураббий мендан сўраганида тугатмоқчи эканлигимни айтгандим. Лекин мураббий сени ҳали кучинг бор, ўйнайсан, жамоага ёрдаминг тегади, деб менга ишонч билдирди. Шунинг учун яна бир йилга шартнома имзоладим. Жамоа раҳбариятига ва мураббийларга раҳмат айтмоқчиман.

- Яна бемалол жамоангизга ёрдам беришга кучингиз етадими? Янги мавсумга ўзингизни қандай тайёрлайсиз?

- Кучим етмаганида бош мураббийга энди кучми етмай қолди, деб ўзим айтардим. Мени ҳали кучим бор. Ҳар куни дам берган вақтларда ҳам ўзим бориб шуғулланиб турибман. Худо хоҳласа, янги йилдан кейин машғулотлар бошланади. Ана шунда жамоамиз билан қишки йиғинни ўтказамиз.

- 2025 йилги мавсум фаолиятингизда охиргиси бўлиб қоладими ёки...

- Охиргиси бўлиб қолса керак.

- Нима деб ўйлайсиз, бу ёшда гол уриш жуда мураккабми?

- Гол уриш мураккаб эмас. 90 дақиқа ўйнасангиз барибир вазиятингиз бўлади. Шу боис гол уриш учун ўйнаш керак.

- “Динамо”ни янги мавсум учун мақсадлари қандай?

- Ҳозирча аниқ эмас. Худо хоҳласа, янги йилдан кейин билиб оламиз.

- Ортда қолган мавсумда ўзингизни ва “Динамо”ни иштирокидан қониқдингизми?

-“Динамо” бундан ҳам яхши натижаларга эришиши мумкин эди. Аммо бу натижа ҳам ёмон эмас. Про лигадан чиқиб 8-ўринни олиш осон иш ҳисобланмайди. Ўзимга келсак, йўқ, қониқмадим. Буни сабабини, нима учунлигини ҳамма мухлислар билади.

Шуҳратбек Жўраев.