Рўзиқул Бердиев: "Ал-Файсали"нинг кучсиз томонлари ҳам бор ва бу бизга маълум!

Осиё Чемпионлар лигаси гуруҳ босқич 3-туридан ўрин олган “Насаф” – “Ал-Файсали” учрашувидан олдинги матбуот анжуманида “аждарлар” устози Рўзиқул Бердиев иштирок этди ва ўз фикрларини билдириб ўтди.

-“Ал-Файсали” жамоаси ўйинни жуда ҳам яхши ташкил қиладиган жамоа. Уларнинг таркибида жуда маҳоратли футболчилар бор. Биз ушбу жамоанинг 2 та ўйинини таҳлил қилиб чиқдик ва рақиб ҳақида тасаввурга эгамиз. Ўйлайманки, эртанги ўйинга жамоамиз ҳар томондан тайёр бўлади.

"Ал-Файсали" ўтказган икки ўйинни ҳам унчалик омадга боғламаган бўлардим. Рақибимиз "Ал-Садд"га қарши ўйинда жуда тартибли ўйин намойиш этди ва жамоа сифатида ҳам жуда яхши ҳаракат қилди. Таркибдаги маҳоратли футболчиларнинг савияси "Ал-Садд" устидан қозонилган ғалабада яққол намоён бўлди.

"Ал-Файсали"нинг ўйинларини кузатиш орқали ушбу жамоа ҳақида тасаввурга эга бўлдик. Уларнинг кучли томонлари бўлгани каби кучсиз томонлари ҳам бор ва бу бизга маълум. Биз айнан шулардан фойдаланган ҳолда ҳаракат қиламиз.