Рўзиқул Бердиев: “Сўғдиёна” бу йил барқарор жамоага айланди
Ads

Олий Лига 29-туридан ўрин олган “Сўғдиёна” – “Насаф” (0:3) ўйинидан сўнг бўлиб ўтган матбуот анжуманининг дастлабки қисмида “Насаф” бош мураббийи Рўзиқул Саъдуллаевич иштирок этди ва ўйин ҳақида қуйидаги фикрларни билдириб ўтди.

 – Бугунги ғалаба билан ва муддатидан аввал бронза совринини қўлга киритганимиз билан барча футболчиларимизни, мухлисларимизни ва клубимиздагиларни самимий табриклайман. Бундай ютуқни қўлга киритиш албатта ёқимли. Ўйин ҳақида тўхталадиган бўлсам, бугун футболчиларимиз ўз даражасида ва савиясида ўйнашди. Улар бугун ўзларидаги маҳоратни намойиш қилишди. Албатта бу ғалабанинг асосий омили бўлди.

 “Сўғдиёна” жамоаси ҳақида гапирадиган бўлсам, шуни эътироф этиш керакки, жамоа ўтган йилларга нисбатан бу йил анча барқарор ўйин кўрсатди ва натижани ҳам ўзларингиз кўриб турибсизлар. Бу жамоадаги ўйинчиларда ғалабага бўлган иштиёқ ва ирода катта. Мен бу ерда фақат бугунги ўйин ҳақида гапираётганим йўқ. Футболчилар мавсум давомида ана шундай кайфиятда ўйинлар намойиш этишди. Буни биз ҳам кузатиб келаяпмиз. Бугунги қўлга киритган ғалабамиз ҳам осон бўлмади. Жамоа мураббийларининг олиб бораётган ишлари ҳам мақтовга сазовор. Улар ўйинчиларнинг савиясини кўтаришга эришишди ҳам, энг асосийси жамоа футболчиларида юқорига интилишга ҳоҳиш бор. Энди жамоадаги камчиликларни айтиб ўтирмайман, чунки буни жамоа мураббийлари жуда яхши билишади. Агар жамоанинг худди Музаффар Музаффаровдек, Ихтиёр Тошпўлатовлардек яна ҳимоя ва марказда ўйнайдиган ўйинчилари бўлса, жамоанинг ўйини бундан ҳам кучаяр эди. Ишонаманки, жамоа мураббийлари бу борада ишлар олиб боришмоқда. “Сўғдиёна” жамоасининг келгусида бундан ҳам кучли ўйин намойиш этишига ишонаман.

 Жамоамиздаги Жиззахлик ёш футболчилар? Ҳа, уларда истеъдод бор.  Биз уларга ишонч ҳам билдираяпмиз. Аммо футболда битта истеъдоднинг ўзи етарли эмас. Агар улар доимо ўз устида ишлаб, маҳоратини ошириш бўйича кўпроқ меҳнат қилишса, интилсалар, келгусида мамлакатимизнинг етакчи ўйинчилар қаторидан жой эгаллашади. Уларнинг келажаги ўз қўлида, – деди Бердиев.