Рўзиқул Бердиев ва Шароф Муҳитдинов "Ал-Садд"га қарши ўйин олдидан ўз фикрлари билан ўртоқлашди

Хабарингиз бор, эртага "Насаф" ОЧЛ гуруҳ босқичи биринчи турида "Ал-Садд"га қарши майдонга тушади. Бугун ўйин олдидан матбуот анжумани ўтказилди. Унда вакилларимиз бош мураббийи Рўзиқул Бердиев ва футболчи Шароф Муҳитдинов иштирок этди.

Мураббий: - Ассалому алайкум. Рамазон муборак ҳаммага. Чемпионлар лигаси - энг кучлилар иштирок этадиган мусобақа. Эртанги рақибимиз ҳам нафақат гуруҳ, балки турнирдаги фаворитлардан бири саналади. Шундай экан, бизни осон бўлмаган ўйин кутиб турибди. Йигитлар билан яхши тайёргарлик олиб бордик. "Ал-Садд"га қарши ўйинда натижа учун бор кучимизни ташлаймиз. 

Футболчи: - Ассалому алайкум. Яна бир бор Рамазон муборак. Эртага томошабинлар қизиқарли ўйин гувоҳи бўлади, деб умид қиламан. Рақибимизни бутун Осиё яхши билади. Яхши тайёргарликдан сўнг қўлга киритилган ижобий натижа эвазига мухлисларимизни хурсанд қилишга ҳаракат қиламиз. 

Мураббий: - Биз ОЧЛнинг даражасини яхши ҳис қилиб турибмиз. Бу борада тажрибага эгамиз. Бу ерда осон ўйинлар бўлмайди. Ўтган йили  ОФК кубогида иштирок этдик. Шуни аниқ айта оламанки, чемпионлар лигасидаги клубларнинг даражаси бир-биридан кескин фарқ қилади. 

Пандемия сабабли мусобақа марказлашган тарзда ўтказилишига мажбур бўлди. Ўйлашимча, бу тўғри қарор. Албатта, бунинг ўзига яраша қийинчиликлари бор. Икки ҳафта ичида олтита ўйин ўйнаш футболчилар учун жуда ҳам қийин. Бироқ биз бунга мажбурмиз ва тайёргарлик кўрганмиз. Ўйлайманки, мусобақа яна эски форматига қайтиб, уй-сафар ўйинлари бўлиб ўтади. Сабаби, бизнинг мухлисларимиз ҳам ОЧЛ ўйинларини жонли томоша қилишни истайди.