Румменигге ўзи танқид қилиб келган ПСЖ хўжайини Ал-Хелайфийни нега мақтаб қолди?

​“Бавария” раҳбарларидан Карл-Хайнц Румменигге ҳар доим ҳам “Пари Сен-Жермен” ва унинг президенти Носир Ал-Хелайфийга нисбатан яхши муносабатда бўлмаган. У кўпинча QSI (Qatar Sports Investments) эгалигидаги клубнинг иқтисодий моделини адолатсиз, деб танқид қилар, қимматбаҳо трансферлар ва ҳатто футболчиларнинг кибрли эканлигини таъкидлаб келарди.

​Бироқ, буларнинг барчаси ўтмишда қолди. “Бавария”нинг собиқ бош директори ва ҳозирги кузатув кенгаши аъзоси бугунги кунда ПСЖ ҳамда унинг президенти томонидан амалга оширилган ишларга қойил қолмоқда. У қатарлик ҳамкасбига бўлган илиқ муносабатини билдиришдан ҳам тортинмади.

​- Носир Ал-Хелайфийнинг мухлислар томонидан шундай яхши кутиб олинаётганидан хурсандман. Аслида мухлислар ҳам ундан қарздор. Чунки Qatar Sports Investments сотиб олгунига қадар “Пари Сен-Жермен” қанақа клуб бўлганэди? Мен ҳали ҳам эслайман: 2020 йилги финалда бизга ютқазганидан кейин Носир бутунлай тушкун ҳолатда эди. Ўшанда мен унга сабрли бўлиши кераклигини айтгандим.

Футболда ҳеч нарса олдиндан кафолатланмайди. Ҳамма нарсага пешона тери билан эришиш, ақлли трансферларни амалга ошириш лозим. Кийиниш хонасида шундай руҳ бўлиши керакки, у сенга кубокни ютиш учун етишмаётган ўша 3-5 фоизлик қўшимча кучни бера олсин.

ПСЖ яна ярим финалга чиққани тасодиф эмас. Улар ажойиб футбол кўрсатишмоқда, - дея таъкидлади Румменигге ўз интервьюсида.