Рустам Нартаджиев: "Локомотив"га захирада ўтириш учун қайтмадим"

Куни кеча “Сурхон”дан “Локомотив”га қайтиб келган дарвозабон Рустам Нортожиев клуб матбуот хизматига қисқача интервью берди.

- Рустам, “Локомотив”га қайтганингиз муборак.

- Раҳмат.

- “Локо”га қайтишингиз қай тариқа амалга ошди?

- “Сурхон” билан шартномам якунига етганди. Шу сабабли “Локомотив” раҳбарияти мен билан боғланди ва жонажон жамоамга қайтишни таклиф қилишди. Бу таклифни бажонидил қабул қилдим.

- “Сурхон”дан қанчалик миннатдорсиз? Ўтган мавсум иккинчи даврада жамоанинг асосий қутқарувчиси ва таъбир жоиз бўлса, жамоанинг Суперлигада қолишида асосий роль ўйнадингиз.

- “Сурхон” раҳбариятидан чексиз миннатдорман. У ердаги жамоадошлар билан ишлаш, машғулот қилиш менда ўзгача таассурот қолдирган. Ўтган мавсум “Сурхон” учун омадли ўтди дея оламан. Чунки клуб қўйган вазифа бажарилди, деса ҳам бўлади. Ўз навбатида менга ишонч билдирган мураббийлар штабига ҳам раҳмат айтаман. Улар менга яхши тарафларимни кўрсатиш учун катта имконият беришди.

- Айни пайтда Абдумавлон Абдужалилов ҳамда ёш посбонимиз Шоҳруҳ Исоқов асосий таркибдаги дарвозабонларимиз ҳисобланишади. Рақобат жамоада қанчалик муҳим, деб ўйлайсиз?

- Абдумавлон Абдужалиловни яхши танийман. У яхши дарвозабон. Суперлигада жуда кўп ўйинларда майдонга тушди ва катта ўйин амалиётига, тажрибага эга. Аммо “Локомотив”га захирада ўтириш учун қайтмадим (демак, Абдумавлон Абдужалилов ҳам рақобатга тайёр туриши керак). Рақобат эса доимо бўлиши шарт, футболчи шу орқали ўсади. Доимо кучлилар билан рақобатда бўлиш орқалигина энг яхшиси бўлиш мумкин.

- Ушбу мавсумда ўз олдингизга қанақа мақсадлар қўйгансиз?

- “Локомотив” билан совринли ўринларни олмоқчиман. Олдимизда бутун бир мавсум кутиб турибди. Энг аввало, чиройли ўйин кўрсатишимиз керак.

“Локомотив” матбуот хизмати.