Сёмин жаҳон чемпионатида сенсация бўладиган терма жамоани айтди

Ўзбекистон терма жамоаси 2026 йилги жаҳон чемпионатида сенсация ярата олади. Бу ҳақда Россия терма жамоасининг собиқ бош мураббийи Юрий Сёмин ўз фикрини билдирди.

Унинг таъкидлашича, мусобақада асосий фаворитлар сифатида Аргентина, Испания, Франция ва Германия терма жамоалари кўрилмоқда.

«Энг катта сенсацияни Ўзбекистон қилиб қўйсин. Мен учун асосий фаворитлар – Аргентина ва Испания. Албатта, Франция ҳам шулар қаторида. Эҳтимол, Германияни ҳам қўшар эдим», – дея таъкидлади Сёмин «Спорт-Экспресс» нашрига берган интервьюсида.

Унинг сўзларига кўра, Ўзбекистоннинг финал босқичига йўл олишининг ўзи катта ютуқ ҳисобланади. Шу билан бирга, терма жамоа бу босқичда ҳам кутилмаган натижа қайд этиши мумкин, аммо бу жуда қийин бўлади.

Эслатиб ўтамиз, Ўзбекистон терма жамоаси жаҳон чемпионатида Португалия, Колумбия ва ДР Конго жамоалари билан бир гуруҳдан жой олган.