Сакен Бибосинов: "Ҳасанбой Дўсматов асосий рақибларимдан бири бўлади "

Маълумки, жорий йилнинг 15-16 сентябрь кунлари Самарқанд шаҳрида Шанхай Ҳамкорлик Ташкилотига аъзо мамлакат раҳбарларининг навбатдаги йиғилиши бўлиб ўтади. Самарқанд саммитидан аввал ташкилот фаолияти доирасида биринчи бор “Шанхай Ҳамкорлик Ташкилотининг спорт элчилари” лойиҳасига асос солинди ва  пойтахтимизда унга бағишланган матбуот анжумани ҳам бўлиб ўтди. 

Унга қозоғистонлик боксчи, жаҳон чемпиони Сакен Бибосинов ҳам ташриф буюрди. 

Биз қисқача ушбу чармқўлқоп устаси билан суҳбат қурдик. 

- Сакен сизни Тошкентда кўриб турганимиздан хурсандмиз!

- Албатта, туғилиб, вояга етган заминга яна ташриф буюрганимдан бошим кўкка етди. 

- Тошкент вилояти Бўстонлиқ туманида таваллуд топганингизни ўзбекистонлик бокс ихлосмандлари яхши билади. Бироқ, Қозоғистонга кўчиб кетишингизнинг асосий сабаби нима бўлган эди. Айнан спортдаги каръера учунмиди?

- Йўқ. Буни спорт билан боғламаган бўлардим. Шунчаки оилавий  Қозоғистонда яшашга қарор қилганмиз.

- Ўзбекистондаги фаолиятингиз мобайнида қандай мусобақаларда иштирок этгансиз?

- Ўсмирлар тоифасида Республика доирасидаги турнирларда қатнашганман. 

- Биласизми, сизни Белграддаги жаҳон чемпионатида Ҳасанбой Дўсматов билан жангингиз жуда қизиқ бўлганди. Бу тўқнашув ҳақидаги фикрингиз қандай?

- Ҳасанбой Дўсматов қандай боксчи эканлигини барча яхши билади. Олимпиада чемпиони ва "Вела Баркер" кубоги соҳиби бўлган. Илк жангимиздаёқ дуч келишимизни кутмагандим. У профессионал боксдан яна ҳаваскорга қайтганди. Умуман олганда яхши жанг бўлган. У 48-49 кг вазн тоифасида жуда кучли ва -51 кгда бироз бўйи кичиклик қилмоқда деган фикрдаман. 

- Токио Олимпиадасидан кейин Қозоғистон терма жамоаси мураббийлар штабида ўзгариш бўлди. Айнан ушбу омил жаҳон чемпионатидаги ижобий иштирокнинг сабаби бўлдими?

- Ҳа, албатта. Бир қатор медалларни қўлга киритдик. 

- Профессионал боксга ўтиш борасида ҳам янгиликлар бордир?

- Ҳозирча бутун эътиборимни Тошкентдаги жаҳон чемпионати ва Париж Олимпиадасига қаратганман. Шундан кейин бу борада бош қотирамиз.

- Нима деб ўйлайсиз, ушбу юқорида санаб ўтган муҳим турнирларда катта хавфни қайси боксчилардан кутяпсиз?

- Агар, Ҳасанбой Дўсматов иштирок этса, у асосий рақибларимдан бири бўлади. Ҳозирда ҳаваскор йўналишдаги Халқаро турнирларда иштирок этмоқда ва яхши жисмоний ҳолатга эга бўлаётгани аниқ. Шунингдек, ҳиндистонлик Амит Пангални айтишим мумкин. Куба, Россия ва Таиланд боксчилари ҳам катта хавф саналади.

- Сакен ажойиб жавоблар ва вақт ажратганингиз учун миннатдорчилик билдирамиз!

- Эътибор учун раҳмат!