Салоҳ, де Брюйне, Лукаку... Шомуродовга устозлик қилаётган Моуриньонинг “нозик ўйинлари”
Бугунги кунда Элдор Шомуродовнинг “Рома” ўтгани муносабати билан Рим клубига мухлислик қиляпмиз. Италияда порлай бошлаган ҳамюртимизни ушбу мамлакатнинг гранд клубларидан ҳисоблаган “Рома”га таклиф қилгани учун бош мураббий Жозе Моуриньога ҳам ҳурматимиз ошгани ҳам бор гап.
Дарҳақиқат, Жозе ўзига хос мураккаб характер ва кучли қатъиятга эга ўзгача мутахассис. Моуриньо ўзи ишлаган жамоаларнинг аксариятида турли можаролар, келишмовчиликлар, зиддиятларга дуч келиши ҳам ҳеч кимга сир эмас.
Ушбу мураббий фаолиятига эътибор қаратсак, Моуриньо доим ҳам адолатли қарор қабул қилмагани, худбинлиги туфайли айрим футболчиларни жамоадан кетишга мажбур қилгани намоён бўлади.
Айниқса, Жозе фаолиятида “Челси” алоҳида аҳамият касб этади. Португалиялик мутахассис “аристократлар”дан бошқа ҳеч бир жамоани икки маротаба бошқармаган. У Лондон клубида 2004-2007 ва 2013-2015 йиллар давомида бош мураббий лавозимида ишлаган.
Моуриньонинг “Челси”даги биринчи даври анча муваффақиятли бўлган. Унинг қўл остида “кўклар” икки мартадан Англия чемпионлиги ва Футбол лига кубогини, бир маротабадан мамлакат кубоги ва Суперкубогини ютган. Кейинги бошқарув вақтида эса, Моуриньо шогирдлари бир бора премьер-лига олтин медали ва Футбол лигаси кубогига эга чиқди.
Айнан 2013-2015 йилги фаолияти даврида Моуриньо шахсий қарашлари ва мураккаб характери туфайли бугунги куннинг энг ёрқин юлдузларига айланган уч нафар футболчи - Муҳаммад Салоҳ, Кевин де Брюйне ва Ромелу Лукакуни “Челси”дан ҳайдашга жазм қилган. Бу ҳақда Жозе Моуриньонинг қўл остида ишлаган“Челси”нинг собиқ мураббийи Эдди Ньютон бор ҳақиқатни айтиб берди.
- Муҳаммад Салоҳ ва Кевин де Брюйненинг кетказилиши уларнинг истеъдоди ва салоҳияти билан боғлиқ бўлмаган. Бу Жозе Моуриньонинг характерлар тўқнашувидан сўнг қарори оқибатида юзага келган. Бу футболчилар керагидан ортиқ яхши ўйнарди. Лекин бош мураббийнинг нуқтаи назари уларникидан фарқ қиларди. Шу боис, улар бир жамоага сиғмади, - дейди Эдди Ньютон.
Муҳаммад Салоҳ “Челси”га 2014 йилда “Базель”дан олиб келинган эди. 13 та учрашувда бир жуфт гол урган мисрлик ҳужумчи Моуриньога ёқмагани сабабли, аввал “Фиорентина”га, кейин “Рома”га ижарага бериб юборилади. Римликлар 2016 йилда Салоҳнинг трансфер ҳуқуқини тўлиқ сотиб олади. 2017 йили Англияга қайтган Муҳаммад “Ливерпуль” таркибида ҳақиқий юлдузга айланди ва бугунги кунда жамоанинг асосий тўпурари ҳисобланади.
Замонавий футболнинг энг зўр плеймейкерларидан ҳисобланган Кевин де Брюйне 2012 йили “Генк”дан “Челси”га ўтганида анча шаклланган футболчи эди. Бироқ, у “аристократлар” сафида атиги уч марта майдонга тушган. Аввал ўз юрти Бельгияга ижарага жўнатилган ярим ҳимоячи, Моуриньо даврида клубни бутунлай тарк этиб, Германия Бундеслигасидан қўним топди.
2015 йили “Манчестер Сити” таклифини қабул қилиб, Англия премьер-лигасига қайтган Кевин де Брюйне нафақат Жозе Моуриньога, балки бутун дунёга қанчалар юқори салоҳиятига эга футболчи эканини кўрсата олди.
Ромелу Лукаку тушган вазият бироз бошқача. Эдди Ньютоннинг айтишича, ўша пайтларда бельгиялик ҳужумчи ўзининг ижобий хислатларини кўрсата олмаган. Аниқроқ айтганда, катта клубнинг ҳужум чизиғи етакчиси бўлишга ёшлик қилган экан. Моуриньо эса, унга имкон беришни истамади.
- Ҳамма турли фикр билдираётганига қарамай, Лукаку ўша пайтда “Челси”да ўйнашга тайёр эмасди. Ромелу “аристократлар” сафини 2012 йилда тарк этган Дидье Дрогба ўрнини босишга қодир бўлмаган. Уни ҳар доим Дрогбага таққослашади. Лекин ўша пайтда бу адолатсиз таққослаш эди. Улар умуман бошқа тоифадаги футболчилар ва турли вазиятда эди.
Лукаку бугунги кунга келиб, тажрибали ва моҳир ҳужумчи сифатида “Челси”га қайтди ва илгаригидан фарқли равишда, дарвозага тескари ҳолатда тўпни қабул қилса ҳам, рақиб дарвозасини ишғол қила оладиган даражага етган. Ҳозир у ҳар қандай вазифани уддалай олади. Ромелу шу даражадага етиб, “Челси” талабига жавоб бера оладиган ҳужумчи бўлиш учун машаққатли меҳнат қилди, - дейди Эдди Ньютон.
Лукаку 2011-2014 йиллар давомида “Челси” рўйхатида турган ва атиги ўнта учрашувда майдонга тушган. Бельгиялик ҳужумчи жорий йилнинг ёзида Лондонга қайтгунича, “Челси” Лукаку гол урмаган ягона жамоа бўлиб турган эди. Ромелу ушбу жамоадан бошқа ўзи ўйнаган “Андерлехт”, “Вест Бромвич”, “Эвертон”, “Манчестер Юнайтед”ва “Интер”да доим тўпурарлик маҳоратини намойиш қилиб келган.
Яқинда 98 миллион фунт эвазига “Челси” ҳужумчисига айланган Лукаку премьер-лигада олтита учрашувда учта тўп киритиб, “аристократлар” учун ҳам гол ура олишини намойиш қилди.
Бугунги куннинг ёрқин юлдузларини тан олмаган Жозе Моуриньо эса айни пайтда “Рома”ни Италия чемпионатида муваффақиятлар сари етаклашга ҳаракат қилмоқда.
Фикрлар