Самвел Бабаян: "Сурхон"да юлдуз ўйинчилар йўқ, лекин..."

“Навбаҳор” клуби Тошкентда “Сурхон”ни қийинчилик билан мағлубиятга учратди. 1:2 ҳисобида якун топган беллашувдан кейин наманганликлар бош мураббийи Самвел Бабаян саволларга жавоб берди.

- “Навбаҳор”нинг барча мухлисларини ғалаба билан табриклайман. Анча оғир ўйин бўлди. Жисмоний куч талаб қиладиган беллашув гувоҳи бўлдик. Тўғриси, анча қийналдик. ОЧЛ баҳсида катта куч сарфлаганимиз бугунги учрашувда ўз таъсирини кўрсатди. Бир қатор қийинчиликлар юзага келди. Йигитларга ўз миннатдорчилигимни билдираман. Бундай оғир ҳолат бўлишига қарамасдан вазиятни қўлга олишди. Айниқса, ҳисоб зараримизга ишлаётган пайтда ҳам улар яхши ўйин кўрсатишди. Чунки биз бу учрашувда фақат ғалаба қозонишимиз керак эди. Ўткир ҳақида алоҳида гапиришим мумкин. Юртимиздаги энг кучли топ даражадаги дарвозабонлардан бири. Пенальтини қайтариб ғалабамизга катта ҳисса қўшгани учун унга алоҳида миннатдорчилик билдираман. Ҳар бир учрашув биз учун жуда аҳамиятли. Қандай ҳисоб бўлишидан қатъий назар – 3:0 ёки 5:0 бўладими, ғалаба ҳаммасидан муҳим. Уч очко жуда зарур. Айниқса, ОЧЛда ўткинчи ўйинлар бўлмайди, миллий чемпионатда ҳам худди шундай. Йигитларимизга яна бир бор раҳмат. Ғалабани жуда-жуда хоҳлашганди ва улар барча маҳоратини ишга солиб, бунга эришишди.

- Остон Ўруновда индивидуал маҳорати кучли. У “Навбаҳор”ни қутқаряпти...

- Уни асосий таркибда майдонга тушмаётганини бошқа сабаблари бор. Бу ерда унинг соғлиги билан озгина муаммо пайдо бўлган. Шу боис Ўрунов баъзи ҳолатларда асосий таркибда тушмайди. Лекин у майдонга тушяпти ва жамоага керакли натижани олиб келяпти. Респект дейишимиз мумкин. Остон жамоамиз етакчиси ва миллий терма жамоамизнинг асосий футболчиларидан бири деб ҳисоблайман.

- Ҳаммаси Остонга боғлиқ бўлиб қоляпти. “Навбаҳор” Ўруновсиз ҳам кучли ўйин кўрсата оладими?

- Менимча, биринчи таймда ўйнаган йигитлар ёмон ўйнашмади. 1:0 ҳисобида ютаётган пайтимизда иккинчисини ҳам уришимиз шарт эди. Яхшигина маҳоратли футболчиларимиз етарли. Футболда биргина ўйинчига суяниб қолиш ҳам яхши эмас. Бизда шундай клубимиз бўларди, у фақат битта ўйинчига суяниб ўйнарди. Агар у бўлмаса натижа ҳам йўқ.

- Жамоада бўйдор, кучли ҳимоячиларга бўлишига қарамасдан барибир гол ўтказиб юборяпти. Қолаверса, клубда бир-иккита етакчиларсиз ўйнаса жамоа ўйини кризис ҳолатига тушиб қолмайдими?

- Айтиб ўтганимдек, ҳар қандай клуб бир-иккита футболчига суяниб қоладиган бўлса, жамоани келажаги бўлмайди. Биз ҳам жамоавий ўйинни қуришни ният қилганмиз. Шундай ўйин ташкил қилишга эътибор қаратяпмиз. Бу фалсафий қарашдан ҳам иборат. Сизни фикрингизга тўлиқ қўшилмайман. Жамоавий ўйин туфайли голлар уряпмиз. Бугун ҳам шундай бўлди. Бир нарсани тўғри тушунинг, биз босим билан ўйнаяпмиз. Жамоамизга натижа жуда керак. Чунки натижа учун ўйнаяпмиз. “Ал-Ҳилол”дек рақибларга қарши жамоавий ўйнамаганимизда натижага эриша олмасдик. Биз жамоавий ўйин ташкил қилмоқдамиз.

- Ҳимоячиларга нисбатан муносабатингиз қандай бўлди?

- Баъзи ҳолатларда ҳимоячиларда ҳам хатолар бўляпти. Чунки ОЧЛ ўйинида кўп куч йўқотганимиз бунга ҳам ўз таъсирини кўрсатди, деб ўйлайман. Ўтказилган голлар ҳам аламли бўлди. Бундай голларни ўтказиб юбормаслигимиз керак эди.

- “Навбаҳор”ни кейинги ОЧЛдаги иштирокини қандай баҳолайсиз? Агар жамоа чемпион бўла олмаса келаси мавсумда ОЧЛда иштирок этиши сўроқ остида қолиши мумкин.

- Йўқотишлар бор, масалан Остонни жароҳати ўйинлар давомидаги жароҳат ва ўта жиддий эмас. Кейинги мавсумдаги иштирокимизга тўхталсам, ўйиндан-ўйинга юқори натижаларга эришишга ҳаракат қиляпмиз. Кейинги ўйинимиз “Насаф” билан кечади ва қандай жанг бўлишини тасаввур қиляпмиз. Рақибни қандай кучга эга эканини яхши биламиз. Олдин айтгандим, иккита йўлимиз бор: ҳамма турнирда ютиб чиқиш ва Осиё Чемпионлар лигасида иштирок этиш ёки барчасини телевидение орқали кўриш. Юқори ўринларга курашишга жон-жаҳдимиз билан интиламиз.

- “Сурхон”га қарши учинчи тўқнашувда ҳам ютдинглар. Бу сафар нималарга кўпроқ эътибор қаратдингиз?    

- Битта жамоа билан уч марта ўйнаш ҳар қандай клуб учун қийин. Учала баҳсда ҳам қийинчилик билан ютдик. Ўйлайманки, Токов ва Арслоновдек ёш мураббийларнинг меҳнати анчагина эканлиги кўриниб турибди. “Сурхон”да юлдуз ўйинчилар йўқ, лекин шунга қарамай, ёш футболчиларни маҳоратли қилиб тарбиялашда уларнинг ўрни катта. Айтиб ўтмоқчиманки, бу йигитлар ёш ва тажрибали. Мамлакатимиз келажаги бўладиган иқтидорларни тарбиялашяпти. Уларга кейинги учрашувларда омад тилайман. “Сурхон”ни шаклланган ва келажаги бор жамоа дейишим мумкин.