Sanjar Shoahmedov: "Zenit"ga yutqazishga yutqazdik, ammo..."

Samarqandning “Dinamo” klubi BAAdagi o‘quv-mashg‘ulot yig‘ini doirasida Rossiyaning nomdor “Zenit” jamoasiga qarshi bahs olib borganidan xabaringiz bor. Bu to‘qnashuvda tajriba o‘z so‘zini aytdi va “Zenit” samarqandliklar jamoasini 5:1 hisobida dog‘da qoldirdi.

“Dinamo” safiga yangi qo‘shib olingan futbolchilar ham bor. Jumladan, yarim himoyachi Sanjar Shoahmedov bo‘lajak mavsumni samarqandliklar tarkibida boshlaydi. U “Zenit”ga qarshi bellashuvning ikkinchi bo‘limida maydonga tushdi. Futbolchi avvalo o‘yindan olgan taassurotlari haqida gapirdi.

- O‘zingiz bilasiz, “Zenit” kuchli jamoa. Rossiyaning ham chempion jamoasi. U erga kuchli o‘yinchlar va kuchli legionerlar yig‘ilgan. Albatta, bizning jamoaga bunday raqib bilan o‘yin o‘tkazish ancha yaxshi. Ayniqsa, yoshlarni o‘sishiga ancha yordam beradi va tajriba olishadi. To‘g‘ri, “Zenit”ga yutqazishga yutqazdik. Ammo tajribali futbolchilarga qarshi va taktika tomonlama ham “Dinamo”ga foyda bo‘ladi.

- Ayting-chi, "Zenit" faoliyatingizda siz qarshi o‘ynagan eng nomdor klubmi yoki...

- Ha, to‘g‘ri, meni faoliyatimda kuchli raqiblarga qarshi bahslarda “Zenit” ham bor. “Borussiya” Dortmund ham. “Lokomotiv”da o‘ynaganimda ularga qarshi maydonga tushgandik. “Al-Sadd”, “Krasnodar”, “Lokomotiv” (Moskva) kabi jamoalar ham bor. Adashmasam, “Lokomotiv”da to‘p surib yurgan chog‘imda Dubayda ham “Zenit”ga qarshi o‘ynagandim. Menimcha, ularga qarshi bu ikkinchi o‘yinim.

- O‘yindan keyin raqib o‘yinchisi bilan futbolka almashish imkoni bo‘ldimi?

- Yo‘q, futbolka almashmadim.

- Umuman, "Dinamo"ni tanlashingiz nima bilan bog‘liq bo‘ldi?

- “Dinamo” bilan bog‘liq? Bu erda o‘zim oldin birga o‘ynagan futbolchilar bor. Salim Mustafoev, Xusniddin G‘ofurov, Dilshod kabi o‘yinchilar ham klubga kelishdi. Qolaversa, murabbiyni o‘zi ham meni jamoaga taklif qilgan.

- Vadim Abramov siz uchun faoliyatingizdagi eng yaxshi murabbiymi?

- Faoliyatimda bir qancha mutaxassislar bilan birga ishlaganman. Har bir murabbiyni o‘ziga yarasha yaxshi taraflari bor. Tabiiyki, Abramov ham faoliyatimdagi yaxshi mutaxassislardan biri.

- “Dinamo”ni bu yilgi maqsadi nimadan iborat?

- Bu yil iloji boricha yuqori o‘rinlardan birini egallab, 2024 yilgi Superligani ko‘tarinki kayfiyatda tugatishni istaymiz. Shunga yarasha klubga jiddiy maqsadlar qo‘yilgan.

Shuhratbek Jo‘raev.