"Сантос" раҳбарияти мураббийни ишдан олди, бироқ, футболчилар уни қайтаришни талаб қилишди

Бразилиянинг "Сантос" клуби бош мураббийи Левир Кулпи жума куни истеъфога чиқарилган эди. Бироқ, орадан кўп ўтмай дарҳол яна ўз лавозимига қайтарилди.

Globo Esporte нашрининг маълум қилишича, устозининг ишдан бўшатилганини эшитган футболчилар ўша заҳотиёқ клуб президентининг олдига боришган ва Кулпининг амалдаги шартномаси якунига қадар жамоада ишлашини талаб қилишган. Шундан сўнг президент 64 ёшли мутахассисни яна ўз лавозимига қайтаришга мажбур бўлган.

Қайд этиш керакки, унинг “Сантос” билан амалдаги шартномаси жорий йилнинг декабрида ўз ниҳоясига етади.

Маълумот учун, “Сантос” айни дамда Бразилия чемпионатида 4-ўринни эгаллаб турибди.