Саудия Арабистонида ишлаётган "Тоттенхэм"нинг собиқ устози яна Лондон клубига қайтиши мумкин. Фақат...

"Вулверхэмптон" ва "Тоттенхэм"даги фаолияти билан танилган португалиялик мутахассис Нуно Эшпириту Санту яна Англия премьер-лигасига қайтиши мумкин.

The Telegraph нашри тарқатган хабарга қараганда, 48 ёшли мутахассис Лондон клубларидан бирини бошқариши мумкин. Манбага кўра, унинг хизматларига "Вест Хэм" қизиқиш билдирмоқда. Боиси, “болғачилар” раҳбарияти Дэвид Мойес бошчилигидаги жамоа ўйинидан норози.

Ўтказилган 19 ўйиндан сўнг пойтахт жамоаси 15 очко жамғариб, премьер-лига турнир жадвалида 18-поғонада бормоқда.

Эслатиб ўтамиз, Эшпириту Санту айни дамда Саудия Арабистони чемпионатида ишламоқда. У “Ал-Иттиҳод” бош мураббийи ҳисобланади.